設定貼子語言 Set language for posts :
中文
English
中英雙文 English & Chinese

31.08.2007 | 國家50歲

2007年8月31日, 國家獨立50週年.. 可能係50年嘅關係, 所以覺得今年氣氛比往年嚟得濃厚, 濃厚得連我呢個唔係咁效忠國家嘅人都可以感染到.. 所以我竟然喺MSN放個【50 Years of Malaysia Nationhood】咁嘅message, 結果就畀李X明小姐恥笑我, 話我懶愛國.. 其實唔係架, 自己國家可以去到50年後呢個繁華進步(雖然仲有好多方面需要好好改善), 我都覺得好驕傲架.. 尤其係各個民族可以和睦相處, 我就覺得非常難得(當然講呢句說話係需要對某些方面隻眼開隻眼閉).. 好喇, 點到即止, 唔方便喺blog度談論太多敏感話題, 費事惹得一身蟻..

講返50週年, 今年好似特別多商業機構響應, 尤其商場更是一大堆國慶特價品, 地鐵公司喺人流較多嘅站免費派發國旗仔, 見乘客人人手上一支旗揚吓揚吓咁, 都不知幾過癮.. 報章份份都出特刊回顧國家獨立50年, 裡頭啲文章舊相片, 睇得我津津樂道, 霎時間覺得自己了解國家又深咗一層, 哈哈!! 李X明小姐睇到呢句, 係又要恥笑我喇, 不過懶理啦, 喺度祝馬來西亞獨立50週年快樂, 繼續繁華進步..

30.08.2007 | 我的創作, 我的啟發

以下為出自小弟筆下嘅復古Retro波點色彩圖案, 主題係六十年代disco agogo fever, 只係用咗Microsoft Word就可以完成架喇.. 一路以來都對呢個年代用色嘅大膽同奢華(講得平庸啲就係現今社會嘅撞色)情有獨鐘, 那個年代用簡單幾何圖形結構個motif, 跟住就係用有咁撞得咁撞嘅striking color, 好bold好豪爽, 完全吻合那個璀燦荼靡的年代.. 雖則話現今社會漸漸趨向minimalism, simple&clean, 但係偶然間嚟個色彩繽紛, 就更加覺得燦爛無比.. 就好似人生大條道理咁, 平凡中偶然間有點突如其來嘅驚喜, 人都會開心啲啦.. 所以話唔好成日侷促自己於一個淡而無味嘅世界, 要放開懷抱望遠啲, 好大可能就畀你望見你理想中嘅色彩世界架喇.. 大家一齊嚟展望未來, 做個開心人吧~~

29.08.2007 | 集體回「味」

突然間諗起呢個麥當勞同漢堡王之外嘅土產漢堡包, 完完全全出自本土, 絕對原汁原味.. 佢有個響噹噹嘅名叫做Ramly Burger, 絕對係無人不知曉架, 油膩膩就係佢嘅特色喇(但係弊就弊在, 如果佢唔油膩就一啲都唔好味).. 呢種街邊漢堡, 完全係冇國際連鎖店啲quality control架喇, 係要睇個老闆當時個心情同手勢.. 落晒柯打之後, 企喺旁邊睇佢現場製作..
首先喺鐵板上勁落白蘭他margerine起鍋, 煎熟舊肉餅, 跟住單手開蛋, 順時鐘掃三圈整出個蛋皮, 跟住落啲喼汁再勁撒胡椒粉(係啊, 唔駛錢架), 最後將舊肉餅放中間用蛋皮包住.. 將個蛋皮肉餅反轉封底之時, 即刻揮刀將個麵包切半, 裡面搽兩羹白蘭他後, 擺喺鐵板上再煎佢個金黃色.. 跟住將一舊油膩膩蛋皮肉餅擺上油膩膩麵包底面, 豪爽唧三圈辣椒醬, 再放生菜, 洋蔥絲, 番茄同青瓜各一片(注意啲青瓜仲要表面挑花懶高貴咁架), 再嚟重複豪爽唧三圈辣椒醬.. 本來攪成呢個地步, 個漢堡包已經係very loaded架喇, 但係與時並進嘅今日, 好不知所謂哋fusion一下, 再劈羹mayonaise上去後加多層芝士, 最後終於大功告成可以夾埋另外一半麵包喇..

the result is 足足成個老麥巨無霸嘅高度, 都只不過係承惠三蚊!! 呢仲街坊漢堡包, 果然原汁原味誠意十足, 一啖咬落去嗰種感覺(哪哪哪, 小心啲辣椒醬撈埋啲半溶mayonaise撈埋啲油脂一齊必晒出嚟呀), 真係啖啖感動啖啖溫馨架~~ 呢個時候, 忽然餓了..

28.08.2007 | 舟車勞頓

今日要去新加坡attend一個training, 時間係早上11點至下晝6點.. 所以晨早6:30am就出門去機場搭飛機過去, training搞到夜晚7點完畢, 於事又趕去機場搭飛機返去吉隆坡, 到屋企剛好半夜12點.. 今次都係第一次去新加坡去得咁來去匆匆, 平時都會喺嗰度住個一兩晚.. 計過時間今次18小時一日遊睇落的確好疲累, 不過好彩航程都只不過係短短嘅50分鐘, 上咗機唔覺意咁就到喇, 所以基本上唔係太疲累嘅.. 返到屋企沖完涼, 等頭髮乾之余, 都捱得住仲有精力寫寫blog噃.. 來去匆匆咁, 好似都唔覺得自己原來係「出國」返嚟(雖然兩地係近得喺地圖上連粒鼻屎都遮得晒, 但係都真係兩個唔同過家, 話係出國都合乎邏輯架), 感覺就好似返咗日長命工咁咋噃.. 下個星期會有令外一個training, 我又會再飛新加坡喇, 不過呢次會係五日咁多, 到時真係要抽時間搵啲朋友仔出嚟食吓飯至得..

27.08.2007 | 習慣成依賴

每日都習慣會上上網, 上MSN同朋友傾吓偈, [非法]下載最新mp3(聲明: 只作個人聆聽用途!!!).. 星期六夜晚如常, 點知同朋友傾傾吓偈傾到興起嗰一刻, 突然間connect唔到上網.. 嘩, 晴天霹靂啊!!! 結果disconnect再connect, reboot再reboot都於事無補, 最後好冇趣地上床瞓覺.. 第二朝即刻打去customer support, 結果老點我一輪之後, 我好唔願意咁一切照辦後都係唔掂, 其實分明係個server down咗啦, 邊關我啲hardware setup同埋條line事吖.. 喂大佬, 我都係IT人嚟架嘛, 咪當我一般田井市民看待得架, 不過我尊重佢要證明佢啲standard procedure作足都係唔得..

最後佢話冇辦法要escalate畀佢啲technical engineer, 嘩救命啊, 明明就係好小事, 駕唔駕攪到懶深奧咁啊?? 但係星期日搵鬼返工咩, 畀我都一於懶理啦(所以我都唔怪個engineer, 大家都係同行).. 所以成日都冇得上網喇, 夜晚無所事事覺得百般無聊, 全因冇得上網呢個咁殘酷嘅事發生喺我身上(仲要個個月畀晒錢架嘛).. 所以話習慣咗會逐漸變成依賴, 一旦失去就覺得無從適應, 英文叫做deprived是也..

結果咧??? 今日朝早瞓醒, 咩事都冇發生之下, 即刻可以通行無阻地暢游網絡啦, 咪就係個engineer好輕易地click click一個button之嘛.. 有幾咁難攪啊??

25.08.2007 | 我愛MSN

覺得今時今日評定MSN係一種玩意可能已經係唔貼切喇, 因為好似每個人都已經開始用佢嚟溝通, 已經漸漸發展成為一種必要品嘅趨勢.. 由以前信件來往, 到後來電話聯絡, 再到電郵通訊, 而家好似就係MSN年代.. 同事之間唔會再用內線講電話, 甚至同坐喺隔離嘅同事都係用MSN講嘢.. 朋友之間由學生時代書信來往, 到初入社會靠電郵聯絡, 而家就係大家一online就可以盡情地傾得天昏地暗.. 所以話科技越進步, 人類嘅距離就越靠近..

我覺得MSN真係史上一項好偉大嘅發明.. 撇開即時訊息唔講啦, 最抵死就係嗰啲感情豐富嘅emoticons, 真係就咁擺個圖像落去, 就已經一切盡在不言中喇, 對方一睇就即刻收到意思, 好有創意而且鬼馬至極.. 一路來由四方八面熱心朋友捐助之後, 小弟已經儲埋儲埋好多喇, 各位朋友麻煩多多捐贈, 好待我能夠更加感情豐富地同他家聊天吧, 哈哈.. 除此, MSN其他功能都應該要在此表揚啦, 各位MSN擁躉心照不宣喇..

以下為在下一些心頭好, 好多時候同我MSN都會出現嘅朋友, 係唔係好得意啊?? 有咗佢哋都真係多姿多彩啲架..

24.08.2007 | 樂也融融

接同事敏儀噚日火速登場嗰篇blog(今次竟然畀佢捷足先登添).. 因為公司噚日開始一連幾日進行內部小型裝修, 所以我哋一眾同事全部搬入個conference room作為個臨時戰場.. 話說是次裝修係為咗攪攪風水整旺個場, 冀望從此以後生意興隆, 事事順利, 皆大歡喜..

我哋成棚一共九個人九部電腦, 由原本成2000呎寬敞寬敞嘅地方, 通通逼入個唔夠200呎大嘅conference room, 可想而知大家閂埋門一家親嗰種逼硤.. 雖然係逼咗啲, 連要用個鼠都怕整親隔離同事而唔敢大動作, 但係反而覺得大家坐得埋啲自然有講有笑, 感覺拉近好多.. 比起平時各自蘊喺自己個partition入便(由其個花名「客家婆」嘅同事, 成日嗒低個頭, 唔企起身真係見佢唔到), 講嘢要嗌大聲, 又或者要行十幾步先至過位, 呢兩日大家壘埋一齊, 完全冇晒啲距離感同冷清感, 學敏儀話齋, 個feel真係溫馨上昇十倍.. 呢種大家聚埋一齊樂也融融嘅感覺, 我覺得好正呀..

23.08.2007 | ME

最近發現個HDD好似剩低唔係好多位, 所以就決定執執啲file, 將咸豐年前冇用嘅file delete咗去費事嘥位.. 結果執執吓畀我睇返以前到而家儲落嚟啲相, 就一張張開嚟慢慢欣賞.. 突然有一個念頭, 就係逐年揀一張出嚟一字排開睇睇自己咁多年嚟嘅變化.. 於是就誕生咗以下呢一set相喇, 由90年代尚係學生開始(當時未有數碼相機, 所以啲相都係scan出嚟嘅), 跨越千禧由2002逐年到今日.. 小弟喺度獻醜喇~~
睇睇吓都覺得個改變唔大吖, 個樣老晒唔在講, 除咗髮型有些少轉變同埋唔再戴眼鏡之外, 其實個笑容同神情都依舊一致啦.. 不過最重要就係我個註冊商標--矇豬眼--仍然喺度吖嘛, 所以實唔怕會認唔出我噃.. 可惜美中不足, 之間斷咗幾年係冇相嘅, 真係要好好咁搵返啲舊相出嚟, 砌返set完完整整嘅歷年圖, 加上日後每一年都extend多一張, 我覺得真係好值得收藏, 好有紀念價值架..

22.08.2007 | 無字天書

有個靚女同事名叫麗詩, 佢噚日向我投訴我個blog嘅顏色setting, 話黑底白字(有事又用黑底黃字)加上啲字又蟻咁細隻, 佢一睇完之後即刻覺得眼花見暈.. 見佢嗌晒救命咁我又於心何忍呢?? 於是就即刻轉顏色, 以最基本嘅白底黑字打救佢啦, 夠晒義氣啩?? 其實用咗咁耐黑底白字都未有人投訴過, 我諗梗係麗詩姐姐佢老花啦(但係又唔肯認喎).. 哈哈!!

突然之間醒起王菲1994年有一張碟叫做《胡思亂想》..當時負責設計嘅林海峰勁玩white on white, 去盡perfect minimalism.. 淨係用咗白底過光白字, 就成個design搞掂晒喇, 好慳皮而且啱晒王小姐唔中意影相嘅天性.. 我當時覺得簡直係型到爆燈嗰隻.. 所以13年後, 等我再次讓經典重現大家眼前, 寫下呢篇《無字天書》blog, 考考各位眼力, 尤其是係你啊麗詩, 哈哈哈哈..

其實都唔駛點樣傷眼力啦, 只要稍為動動腦筋做點手腳, 包保你可以好輕易咁清清楚楚睇晒成篇嘢嘅.. 咪話我黑心專登玩嘢啊, 其實我都已經手下留情加返啲contrast架喇..

21.08.2007 | 聽得好過癮

英國創作歌手Amy Winehouse於2006年10月推出佢第二張專輯《Back To Black》裡頭第一波主打歌《Rehab》, 無意中經小春介紹後讓我終於有機會欣賞到呢首佳作(雖然有啲相逢恨晚).. 齋睇佢個另類污糟邋遢look的確會覺得不甚開胃, 再聽佢把聲就並非人人可接受.. 不過佢令我聯想起另一位相同風格嘅歌手Macy Gray, 我都同樣非常欣賞佢哋呢種另類騷靈嘅曲風, 簡直入晒型入晒格, 而且帶有些少性感添(哈哈!!).. 千其唔好睇小Winehouse小姐佢啊, 其實佢年紀輕輕已經係得獎無數嘅一位歌手嚟架喇, 今年BRIT Awards最佳英國女歌手得主就係佢噃, 失敬晒啊真係..

講返首歌吖, 其實就係寫佢前經紀公司好意勸告佢戒酒, 反而被佢狠狠拒絕並終止合作嘅故事, 因為佢有好堅定嘅理由點解佢會酗酒, 而且真正可以幫到佢嘅唔係戒酒中心而係佢自己.. 果然好大膽兼有性格嘅作風兼唱風, 唱出嚟嗰種另類+騷靈+funky嘅味道, 實在令在下越聽越過癮..

20.08.2007 | 我的愛情觀??

早幾日有位朋友send咗條link玩個心理測驗, 測試愛情觀, 結果回答幾條問題後, 得到我對愛情嘅各種睇法如下..

*****************************
如果世界末日即將來臨,而你有能力拯救一種動物,你會選擇邊種動物?
真實生活中你會被什麼性格的人吸引:
[馬] 不可駕馭, 自由浪漫的人最吸引你..

如果你旅行至非洲, 遇上一個友善部落, 他們堅持你選擇一種動物作為紀念, 你會選擇邊種動物?
在被追求的過程中,什麼方式讓你最無法抗拒:
[獅] 直接了當告訴你他愛你..

你在世間犯下大錯, 上帝不讓你再投胎為人, 一定要投胎成一種動物, 你會選擇邊種動物?
你最希望留給情人的印象:
[狗] 忠誠, 此情不渝..

如果你擁有能力讓某一種動物從此消失,你會選擇邊種動物?
你最不希望在何種情況下和情人分手:
[蛇] 情緒化, 易變, 你不知道如何使他高興..

某一天,你遇上一種動物可以說人類的語言,你會希望是邊種動物?
你希望和你的另一半建立何種關係:
[馬] 不論事情大小, 你們會相互討論和溝通..

你漂流至一個荒鳥上,你只能有一個動物與你相伴,你會選擇邊種動物?
你對感情世界腳踏兩條船的看法:
[人] 你在乎社會的看法, 婚後你不會有越軌的行為..

如果你會變成某一種動物五分鐘, 你會選擇邊種動物?
你對愛情的看法:
[鴿] 你認為愛情是雙方面的承諾..
*****************************

不妨去玩玩, 睇吓究竟有幾準吖?? http://home.kimo.com.tw/yihjongchen/p2/311.html

19.08.2007 | 誇... 大

今日有個舊同事牛一, 於是就約好一班熟落嘅舊同事去唱K兼食lunch.. 當係幫位舊同事慶祝生日兼聚一聚舊啦.. 禮拜五下晝就訂咗六個位, 嚟到竟然畀咗間超級大間嘅房我哋, 真係好誇張大, 我覺得閑閑地有三四百呎架, 足夠坐滿三十人都唔嫌逼.. 間房一個projector, 兩部大型平面電視, 私人廁所, 兩大套皮舒發, 四張大檯, 一個bar corner, 真係唔係講笑嘅大架.. 個個入到間房都O晒嘴, 六個老人家唱K駛唔駛咁大間啊?? 算係托壽星婆鴻福, 畀我有生之年可以體驗咁奢華嘅唱K經歷, 多謝晒啊, 哈哈..

話是話, 壽星婆其實喺四個月前就開始一直催問我幾時得閑出嚟唱K聚舊.. 真係唔意思喇, 要佢學埋學埋咁多新歌都仲要等到頸長.. 因為之前個project攪到冇日冇夜, 而且又要遷就兩個媽媽同其他人, 要夾個時間大家可以齊齊浦頭確是唔易噃.. 今日畀面壽星婆, 大家終於都誠意拳拳出席.. 其實我自己都好耐一段時間都冇唱K喇, 唱咗首《祝我生日快樂》佢聽, 雖然歌詞內容完全唔應景, 但係都係諗住取其歌名, 喺度隆重其事祝佢生日快樂啦~~

18.08.2007 | 浩浩蕩蕩

八月份company outing公司同樂日, 今日約定一齊去森林保護局(FRIM)行山, 所以晨早就要爬起身出發去集合地點.. 等齊人大家坐埋一檯食完早餐之後, 成棚合共14人就浩浩蕩蕩地出發進攻森林保護局啲遠足徑喇.. 其實自從唔做學生之後, 都好耐未試過成村人一齊去玩喇, 估唔到十幾年後嘅今日就竟然就係與同事一齊(達成呢個願望??), 哈哈..
睇吓大家整裝待發前嗰副得戚樣, 楂住張僅有嘅地圖東張張西望望, 終於出發進攻喇, 行咗兩條樹林路徑, 各位完全感受到平時要多做運動嘅重要性.. 經過樹林, 泥路, 山路, 梯級, 獨木吊橋.. 終於完成呢次(其實一啲都唔艱巨嘅)任務, 再睇吓大家一副飽受摧殘嘅樣, 同先頭啲樣差個天共地啦簡直.. 見唔見before and after兩幅相其實已經唔見咗某啲人啊??

大家辛苦(有幾辛苦啊??)咗咁耐, 於是就決定好好咁慰勞吓自己成朝流出嘅汗水, 到附近一間餐廳食晏為呢次outing劃上一個完美嘅句號.. 睇吓大家有嘢落肚之後, 體力當堂瞬間恢復, 各位同事終於都可以重展開心笑容, 為今日影返幅全體照做結尾喇.. {^@^}"'

17.08.2007 | 毛骨聳然

噚晚無意中睇到個台灣清談節目, 唔記得叫咩名喇, 主持人亦都唔識, 但係個節目就請嚟幾個從事冷門職業嘅嘉賓, 講咗啲關於往生嘅話題.. 嘉賓有個喪禮禮儀師, 有個係拾骨嘅, 有個係壽板店老闆, 其他兩個唔記得係咩行業, 但係就同呢門嘢有關啦.. 佢哋講啲聞所未聞嘅嘢真係令我大開眼界, 對於一啲長輩定下要遵守嘅禁忌都有解答, 真係上咗好寶貴嘅一堂.. 其中個禮儀師講咗個令人毛骨聳然嘅實例, 係咁話嘅:

話說農曆七月有個人諗住去佛廟拜拜, 點知坐咗部的士突然間半途死火, 撻極都撻唔著, 當時地點正好喺間殯儀館正門, 於是司機覺得唔老利就寧願唔收錢都唔繼續載喇, 個人覺得反正唔收錢而且間廟就喺附近, 所以當然樂得落車自己行路去啦.. 點知佢一落車閂埋門, 部的士好離奇咁即刻撻著可以開動喎..

正喺的士開走, 個人打算向前行嘅時候.. 有架黑車正送緊副空棺去某治喪處, 紅燈轉綠燈準備開車時, 點知就咁啱唔知點解副棺突然由後邊滑落嚟.. 個人見此於是就即刻跑埋去幫手擋一擋, 司機落車後仲幫手司機講副棺推返入車尾擺好.. 個人覺得今日無啦啦發生咁嘅嘢, 突然心裡一寒, 記得自己師父曾經講過呢種「空棺煞」係可以用棺木屑嚟化解嘅, 於是就同司機大佬要啲嚟擋煞.. 但係霎時間邊有棺木屑啊?? 於是司機就喺副空棺唔顯眼處就地取材, 刨咗忽木片畀個人當係棺木屑畀佢擋煞喇..

懸異故事就由呢一舊就地刨出嚟嘅棺木片開始喇...

一切過後相安無事直至半夜, 個人瞓瞓吓突然覺得自己好似畀人由後邊熊抱得有咁緊得咁緊, 呼吸非常困難, 而且又覺得週身好似畀好多嘢喺度拉扯咁.. 心感不妙就決定去間佛廟鎮驚, 去到佛廟後, 突然間啲燈全部一盞盞息埋!! 個人見咁猛, 於是就決定去搵師父打救..

喺駕駛途中, 突然間又再覺得自己好似畀人由後邊熊抱得有咁緊得咁緊, 呼吸非常困難, 而且又覺得週身好似畀好多嘢喺度拉扯咁.. 個駕駛盤完全唔受控制, 自己又不由自主地係咁踩油.. 朦朦朧朧中個人好似聽到後邊有警車追隨, 但係已經有點神志不清喇, 最後架車撞落個石墩上.. 因為高速撞落去, 個衝擊力大得將佢拋出車外..

如果你仲係喺度睇緊嘅話, 你一定會以為個人實係凶多吉少啦.. 但係唔係噃!! 不如繼續講啦..

個人被拋出車外後, 朦朦朧朧中聽到警察問佢有冇事, 駛唔駛送佢去醫院.. 個人即刻相當清醒話畀警察知佢撞鬼, 想警察幫手叫部車載佢去搵師父.. 個警察竟然唔開張罰款單畀佢, 仲哦咗聲截咗部的士車佢去搵師父..

如果你仲係喺度睇緊嘅話, 你一定有疑問點解警察唔抄牌唔罰款, 反而好順攤咁哦一聲就放人?? 個嘉賓解釋話其實個警察晨早喺後邊追隨嘅時候, 就已經親眼睇見一切事情嘅發生, 所以咪就係咁囉..

最後個人終於搵到佢師父, 將事情經過一五一十咁全盤話畀師父知.. 結果師父解釋話, 個人要棺木屑擋煞係啱, 但係就唔應該要啲已經有主人嘅嘛.. 而且空棺最容易招惹啲未能妥善安葬嘅遊魂, 所以啲遊魂見個人帶住塊棺木片, 就當佢係新朋友對佢又攬又錫啦.. 其實就出於一片友善而唔係想奪命, 所以個人被拋出車外都一啲都冇事..

如果你係可以全篇睇晒嘅話, 好多謝你嘅耐性, 因為呢篇嘢實在好長, 勁破記錄地長.. 其實噚晚個嘉賓真係講得七情上面, 我空聽時都已經打晒冷震, 我相信當時現場觀眾一定係覺得好寒.. anyway, 睇完就當係個故事算啦, 唔好記實喇, 百唔禁忌啊~~

16.08.2007 | 低脂低糖低卡

早排去超級市場諗住買包芝士嚟夾麵包食, 結果紜紜牌子中有一個唔熟悉嘅牌子, 包裝紙上大大隻字寫明Super Slim Cheese.. 於是就諗都唔駛諗一於買佢啦, 因為個名都已經畀到我呢個消費者一支強心針.. 過後喺間超市入邊行行吓, 發覺其實低脂低糖低卡系列嘅產品已經變成現時社會潮流必要嘅貨品喇.. 咩低脂芝士, 低脂牛奶, 低糖飲品, 低卡麵包, 更過份就係跟晒風唔眨眼嘅低糖糖果, 低脂薯片(oh, 真係唔該晒呀).. 認真諗一諗, 通通都係呃消費稅嘅marketing技倆嚟啫.. 唔通真係會低到太平洋底咩?? 一個唔覺意以為低脂低糖低卡, 反而冇晒戒心變相食得仲多添啦, 冇啦啦攝取更多脂更多糖更多卡, 到時就弄巧反拙啦~~

[To: SK] 要時時警惕自己, 雖然低脂薯片係低脂, 但係低脂薯片勁好味(係呀係呀, 好鬼掛住包Ruffles Natural Sea Salted Reduced Fat Crinkle Cut Potato Chips啊!! 真係好鬼好味架啫) 都係會肥死人架噃.. 哪哪哪, 所以慳慳哋每次食五片當係獎勵自己一日嚟嘅勞碌就好喇, 千其唔好成包落肚當一餐咁激呀..

15.08.2007 | 不可解釋的習慣

頭先同個朋友MSN, 佢突然間問點解我可以咁得閒, 成日都有時間去update我個blog.. 嘩, 畀佢咁嚟一問, 都唔知要點樣答佢好.. 我覺得其實有能力可以寫blog唔係叫做得閒喎, 你夠每日都要食飯啦, 咁可唔可以話點解咁得閒食飯啊?? (嘿, 比喻得好似有啲惡, 失敬失敬) 其實現時都好多人有寫blog嘅習慣架啦, 咪就係當寫篇日記咁啫, 冇乜值得驚訝架.. 況且呀我寫得出嚟post咗上去, 佢咪又係睇得津津有味?? 哈哈..

老實講, 當初學人寫blog都係因為跟風, 所以曾經有一段時間係完全將佢擱置一邊嘅.. 直至最近先至重拾寫blog嘅興趣, 而且隨著post嘅累積, 覺得若干年後重睇自己以前寫過啲嘢, 確係一種回味嘅享受, 就好似睇返自己影過啲相嗰種感覺, 但係文字又比相片更多想像空間噃.. 所以我諗我應該都會keep住寫blog架喇, 當係收集回憶啦..

14.08.2007 | 星光熠熠耀巴黎

權威時裝雜誌Harper's Bazaar食住《The Simpsons Movie》嘅熱潮, 於八月號用左佢哋嚟做主題-- The Simpsons Go To Paris with Linda Evangelista.. 個人認為呢一輯crossover可以算得上係經典佳作喇, 真係畫得栩栩如生兼且好有時裝feel, 睇得我不亦樂乎啊..

[八月號封面] Simpsons一家人抵達巴黎呢個時裝大都會, 一身時髦打扮嘅Linda率領Marge, Selma同Patty, 四美齊齊風風騷騷咁於巴黎街頭招搖過市..
[左]一家大細齊齊整整開開心心去欣賞LV時裝show, 仲同埋阿Marc 揮手示好添.. [右]Marge難得放返把幾呎高嘅頭髮落嚟, 輕依舒發上, 女人味唧晒出嚟一啲都唔輸蝕Linda同埋Donatelli噃..
[左]經阿Karl巧手打理過後, 睇吓Marge著起一身Chanel Haute-Couture係幾咁雍容華貴呀.. [右]JPG阿Jean夾住Linda同埋Marge貓步夜遊巴黎, 睇吓一身蘇格蘭格子紅裙嘅Marge幾咁嬌悄幾咁sweet呀..
The Simpsons and Linda Evangelista for Harper's Bazaar Magazine, August 2007 Issue. Illustrations by Julius Preite.

13.08.2007 | 重拾童真

今朝一返到公司, 就發現pantry多咗好多包零食.. 有蝦條啦, 有雞片啦, 仲有脆口即食麵.. 問起全部同事都話唔係佢哋買嘅, 咁應該係今日請病假嗰位同事買架啦, 唔通買得太多搞到自己辛苦到病咗?? 呵呵.. anyway, 喺度講返句多謝晒先..
記得十幾廿年前仲係小朋友嘅時候, 非常之喜愛食呢幾樣零食, 而且每次買都係偷偷地咁買, 驚死有人知道咁, 可能就係因為偷食嘅關係, 就覺得越是滋味無窮.. 記得以前幾毫子就可以買到包好大包嘅可以慢慢食, 但係而家通脹關係, 不單止起價而且仲越買就越細包(雖然包裝就越係講究), 啪佢兩啖就冇喇, 所以而家都係出呢啲家庭歡樂裝(即係一大包裡邊有十細包), 唔怕你唔夠食啦.. 不過食到三十歲, 其實都係志在喋返個味道, 回味下兒時樂趣, 重拾童真啫, 唔係真係食上癮想食個夠嘅..

11.08.2007 | 技驚四座

自從睇過《Dreamgirls》之後, 就一直好中意《And I'm Telling You I'm Not Going..》呢一首歌, 覺得唱呢首歌一定需要有咁上下功力先唱得起.. 今年BET 美國黑人演藝協會頒獎典禮上, 搵嚟兩個都係叫Jennifer嘅巨肺嚟jam呢首歌, 佢哋分別就係十五年前原唱者Jennifer Holiday, 同埋十五年後重唱者Jennifer Hudson.. 兩人飆歌飆得興奮忘我, 好似誓要撼贏對方咁, 但係對於全體觀眾嚟講, 呢一個組合呢一個安排, 卻係一次聽覺上嘅享受(就係聽覺, 視覺就肯定好落魄).. 兩人合作啲火花簡直就係啪啪聲咁擦晒出嚟啦..

姑且勿論究竟薑係老嘅辣, 定係長江後浪推前浪, 因為硬係要比較對於兩人嚟講都唔公平.. 最緊要其實就係有首好歌聽, 雖然兩人老貓燒鬚, 唱到臨尾竟然出現氣喘.. 知道乜嘢叫做實力, 乜嘢叫做拍爛手掌, 乜嘢叫做技驚四座..

10.08.2007 | 分明搶錢

今日去城中一間大型超級市場買咗兩包口垃圾嚟食, 盛惠五個六毫八於是就畀咗十蚊等找錢啦, 點知找返錢嘅時候, 個收銀話佢冇晒一仙輔幣, 所以最後淨係找返四個四畀我, 分明係屈我兩仙啦.. 雖然兩仙係非常之微不足道嘅數目, 個人嚟講唔覺意跌錢都唔止兩仙, 但係我好記得呢一次已經唔係第一次架喇.. 經常都試過去呢間超級市場買嘢, 佢都明屈明搶幾仙幾仙零錢..

其實咁嚟計落, 每一個顧客都鑑生畀佢明屈一仙, 打開門做生意一日落嚟, 何止幾千人幫襯啊? 咁咪畀佢每日白賺至少幾百蚊?? 條數點計大家心理有數啦.. 而且每樣貨品標價都係零零碎碎XX個九毫九咁, 分明就係捉住個可以白賺一仙嘅機會啦.. 我覺得簡直就係抵觸買賣條款啦, 好無良啊!! 有冇律師喺度啊?? 我好想知道, 可唔可以去消委會告間超級市場架??

越諗就越激氣, 本來都唔想指明係邊一間超級市場嘅喇, 但係唔講又唔憤氣.. 係度呼籲大家鄙視呢間位於城中最高大廈, 中文直譯為「冷藏」嘅超級市場.. 我諗下次我再遇到呢種情況嘅話咧, 一於企硬, 要求找返準確數目零錢, 咪畀佢可以乘機打劫啊!!

09.08.2007 | 功架

噚日同小春MSN傾傾吓偈, 突然間佢話我知佢住喺倫敦咁耐, 終於好似有樣嘢令佢覺得好自豪嘅.. 就係佢搭地鐵嘅時候, 嗰唔駛扶都可以穩如盤根嘅功架.. 依佢形容自己馬步係扎得幾咁穩當, 背上揹住部laptop, 右肩捥住手袋, 左手臂掛住一袋唐人街買嘅雜貨, 耳聽流行曲mp3, 雙手擘開份報紙喺度睇新聞, 最後雙腳夾住一個公文袋.. 我突然間覺得個畫面好搞笑, 好似喺度耍緊雜技咁.. 如果我係乘客嘅話, 實會對呢個細細粒嘅女人投以佩服眼光, 點解佢成身都係嘢成個阿四咁, 都仲可以聽歌睇報紙咁enjoy.. 而且雙腳夾住個公文袋都仲可以扎穩馬步, 一副信心爆燈實唔會前扑後跌嘅樣.. 好犀厲啊小春你~~

而我最後回應佢話: 「實係你個人肥啦, 重心低所以咪穩重啲啫, 唔信你真係扎得咁穩馬步喎..」激到佢紮紮跳, 哈哈!!

08.08.2007 | 北京奧運倒數365天..

距離2008年北京夏季奧運會剛好一年, 天安門廣場今晚隆重其時舉行慶祝活動倒數迎接奧運來臨, 2008年8月8日晚上8時08分為呢個世人盼望, 史上耗資最大(21億美元)嘅奧運會揭開序幕.. 眼前所見, 天安門廣場是夜喺燈光同埋煙火襯托之下顯得特別明亮照人.. 臨時舞台除咗一貫嘅中華表演, 亦都因為中港台各地明星坐鎮而顯得星光熠熠添.. 見到每位中國同胞同埋海內外華人對於呢次奧運嘅熱誠, 身為華人嘅自己其實都感染到嗰份驕傲同埋感動..
不過期間覺得有點突兀就係成龍大哥突然出場, 企喺個台正中間向四方八面揮手達成分鐘咁耐, 就係咁唲起棚牙齋揮手後就收工.. 乜佢係代言人咩? 唔係北京歡迎你嗰五隻福娃咩?? 好無喱頭, 好唔明請佢上嚟做乜???

07.08.2007 | kanasai..

唔記得由邊度學返嚟kanasai呢個字喇, 睇落好似係日文, 但係邊有咁上等啊?? 真正出處係福建話啊, 雖然唔知道佢真正意思, 亦都唔確定佢係唔係粗口, 但係知道呢個字係可以好百搭咁用喺好多宣泄憤怒嘅語氣上..

今朝就係一個好kanasai嘅早上, 原本前幾日收到封依貓話今朝8點鐘有個web meeting吖嘛, 封kanasai依貓清清楚楚確確定定寫明係2007年8月7日早上8時正, 冇花冇假.. 所以今朝6點幾kanasai咁早就逼住要起身, 7點搭3就出門返工, 去到公司啱啱8點.. 於是就login個網頁預備web meeting啦.. 點知kanasai咁乜都冇, 打個kanasai電話又話冇呢條線.. 等咗半個鐘, 忍唔住SMS畀個發依貓人, 結果佢毫無籤意咁回覆話:「係咩? 咁應該係cancelled咗啦..」真係kanasai佢呀, 你cancel唔預先通知聲? 算喇, 唔通知都應該send返封道歉依貓係嘛?? 好似完全唔當回事咁..

真係越諗越激氣, 無啦啦要我早成兩個小時起身, 嚟到又放咗架咁大嘅飛機.. 真係kanasai!!

06.08.2007 | 輕鐵殘酷經歷

每日朝早搭輕鐵返工, 除咗人逼人唔在講, 其實最怕就係喺車廂內逼到動彈不得嘅時候, 遇到以下呢啲超殘酷嘅經歷..
  • 長髮OL洗完頭, 唔知係唔係趕時間, 一於懶理就咁濕立立出門.. 有意無意中意就將秀髮往後一掃, 成劈嘢狠狠咁啪一聲撥喺你塊臉度, 加埋水滴十里外飛濺, 成車廂乘客避無所避!!
  • 聽到閂門聲, 仍然由遠處九秒九速度飛奔逼入車廂嘅乘客.. 因為已經加速奔跑嘅緣故, 所以一衝埋入嚟車廂內嗰一剎那嘅超強momentum, 真係可以撼低成排乘客.. 試過一次畀個肥仔一嘢湧埋過嚟, 真係畀佢撞到入心入肺..
  • 背上揹住一個大袋嘅乘客, 因為左擁右逼, 整親週圍啲乘客其實都會唔覺.. 好心就醒目啲唔好喺咁嘅環境之下揹住死都唔放低啦, 又枒住個位又整親人..
  • 一入車廂就成條死蛇爛鱔咁挨落條扶手柱度, 想話搵個地方扶穩都冇.. 挨喺度又唔企穩, 搞到時時前伏後跌, 整親人又若無其事.. 喂, 柱男柱女們, 係唔係前世欠咗你架??
  • 以為包住頭巾就可以幾日唔洗頭嘅女乘客, 好多次都係個高度啱啱好喺個鼻孔線, 個臭頭準準對個鼻, 稍為呼吸一索足以攞埋我條命.. 相同道理用於有醜狐嘅乘客, 真係唔該晒呀~~

各位地鐵輕鐵火車巴士乘客, 仲有冇咩要補充要伸冤啊??

04.08.2007 | 無言以對

今朝去超級市場買乳酪, 一包六罐裝ready pack嗰啲.. 因為係ready pack, 咁我就托高包嘢想話睇吓入邊係包咗啲口味嘅乳酪先買吖嘛.. 結果揀咗幾包都唔啱, 所以就繼續喺度猛揀.. 可能見我咁俺尖, 於是有個sales好心行埋過嚟..

Sales: 「細路, 係唔係要揀口味啊??」
SK: 「係啊」
Sales: 「咁你要咩口味啊?? auntie可以幫你砌返包噃..」
SK: 「哦, 唔駛喇, 呢包啱我架喇, 唔該晒」講完即刻快閃去畀錢..

大家有冇發覺佢用啲稱呼啊? 勁搞笑啊, 睇佢都係30臨尾40開頭啫, 竟然用稱呼我細路稱呼自己auntie, 哈哈.. 我當時係短褲T-shirt波鞋, 但係點都唔似個細路係嘛? 咁都算喇, 佢都係大我幾歲咋噃, 唔駛叫自己auntie係嘛? 三十歲人畀人叫細路感覺好怪, 一個40歲嘅女人喺你面前自稱auntie--好尷尬..

03.08.2007 | 地獄電話費

[以下呢則笑話, 送畀我所有日做夜做, 永無休止嘅Audit界朋友..]

話說從前有一位政治家, 一位工程師同埋一位專業核數師死後齊齊落到地獄.. 地獄使者接待佢哋之時, 准許佢哋每人可以打一通電話去人間一了心願..

政治家首先撥通點話去總統府, 用咗五分鐘了解同僚為國家人民繼續盡心盡力之後, 地獄使者向佢索求五萬蚊電話費.. 政治家問點解咁貴, 地獄使者話因為地獄到人間吖嘛, 冇收貴佢架喇..

輪到工程師撥通電話去工場地盤, 用咗十分鐘了解工程進行得如火如荼, 放下心頭大石後地獄使者向佢索求十萬蚊電話費.. 政治家問點解咁貴, 地獄使者話因為地獄到人間吖嘛, 冇收貴佢架喇..

最後輪到核數師撥通電話去公司, 用咗二十分鐘了解同事工作進度, 地獄使者竟然只係向佢索求廿蚊電話費.. 於是引起政治家同工程師不滿, 認為收費大細超.. 結果地獄使者解釋話因為個核數師係由地獄打去地獄吖嘛, 咪就係當local call咁嚟計所以咁平囉..

02.08.2007 | 我的朋友仔~~

喺香港養咗呢四個朋友仔, 擺喺公司張檯上邊, 每日返工見到佢哋咁得意個樣, 個人心情都會開心啲.. 上個星期有位同事過香港做嘢, 就托佢幫我湊佢哋過嚟, 終於都返嚟我身邊, 坐正我張檯面喇, 實在係非常之開心.. 之前周不時都有啲掛住佢哋架, 所以就叫同事幫忙好好照顧.. 雖然佢好羨慕, 但係都肯好義氣咁幫佢哋影咗兩幅相寄畀我一解相思之苦, 真係多謝晒啦, 哈哈!! (咦, 今日佢牛一喎, 祝佢生日快樂啦~~)
四個朋友仔係邊位啊?? Loonely Tunes 嘅大口Taz, 迪斯尼米奇老鼠, 迪斯尼唐老鴨同埋唔知邊一門派嘅Rubber Duckie.. 全部傻更更咁嘅樣, 真係好鬼愛佢哋架!!

01.08.2007 | 就係得咁多..

http://www.world66.com/呢個網站剔吓自己去過嘅國家, 發覺原來都幾集中, 就係得亞洲同埋歐洲咋.. 去過17個國家, 七大洲其中兩個, 只係遍布全球國家嘅7%, 可算係少得可憐喇.. 不過17個國家之中, 除做馬來西亞係自己的家, 1個國家係純粹為公干而去(仲係半年間去咗四次), 其餘16個國家都係去玩, 咁都尚算安慰, 哈哈.. 如果真係要遊遍全世界, 足跡踏遍全球, 我覺得真需要窮一生精力同時間(當然仲有金錢)先至可以實現到, 所以話環遊世界80日, 其實都係做戲咁做嘅啫..